Նորություններ

Ամեն տարի, Մայքրոսոֆթի "Գործընկերներ ուսման ոլորտում" ծրագրի շրջանակներում "Նորարար Դպրոցներ" ծրագրին և ռեֆորմների ինտենսիվ գործընթացին մասնակցելու համար ամբողջ աշխարհից ընտրվում են դպրոցներ: Դպրոցներն ընտրվում են իրենց ամբողջ ներուժով ստեղծելու ճկուն, փոխանցելի և վստահելի մոդելներ, որոնք կարող են ազդեցություն ունենալ և փոխանցել իրենց փորձն ու ստեղծված մոդելները այլ դպրոցների` թե իրենց երկրներում, թե տարածաշրջանում և թե ամբողջ աշխարհում:

Այս տարի ծրագրին դիմել էին ավելի քան 114 դպրոցներ, 48 երկրներից: Ուրախ ենք տեղեկացնել, որ բարդ ընտրության և բարձր մրցակցության արդյուքում Երևանի Անանիա Շիրակացու անվան ճեմարանը միջազգային հեղինակավոր ժյուրիի կողմից ընտրվեց 56 ամենաառաջավոր դպրոցների շարքում, որոնք կմասնակցեն "Նորարար դպրոցներ 2010" ծրագրին ողջ տարվա ընթացքում:

Հարկ է նշել, որ ընտրված 56 դպրոցների մեջ են ներառված դպրոցներ ԱՄՆ-ից, Սինգապուրից, Ավստրալիայից, Ավստրիայից, Վրաստանից, Ռուսաստանից, Ֆրանսիայից, Իսրայելից, Շոտլանդիայից, Նորվեգիայից, Լատվիայից, Գերմանիայից, Հարավաֆրիկյան հանրապետությունից և այլ երկրներից:

Հայաստանն այս մրցույթին մասնակցում է երկրորդ անգամ: Նախորդ տարի Նորարար դպրոցներ ծրագրի մասնակից էր ընտրվել Մխիթար Սեբաստացի կրթահամալիրը:

Դպրոցների ընտրությունից հետո Մայքրոսոֆթ ընկերության նախաձեռնությամբ հոկտեմբերի 25-30-ը Հարավաֆրիկյան Հանրապետության Քեյփթաուն քաղաքում տեղի ունեցավ Մայքրոսոֆթի համաշխարհային նորարարական կրթության 6-րդ ամենամյա ֆորումը, որին մասնակցեցին Երևանի Անանիա Շիրակացու անվան ճեմարանի տնօրեն` Աշոտ Ալիխանյանը, ՏՀՏ բաժնի ղեկավար, Ճեմարանի ինֆորմատիկայի ամբիոնի վարիչ, Մայքորսոֆթի "Նորարար ուսուցիչներ" մրցույթի հաղթող` Սուսաննա Գալստյանը և Մայքրոսոֆթի կրթական ծրագրերի ղեկավար` Քրիստինե Գյոնջյանը:

Հպարտությամբ շնորհավորում ենք Երևանի Անանիա Շիրակացու անվան ճեմարանին, Կրթության և գիտության նախարարությանը և մեզ բոլորիս միջազգային հաջողության համար: